Për herë të parë këtë vit, gjimnazi “Halit Bërzeshta” në Prrenjas organizoi kampin veror rinor, duke krijuar një mundësi emocionuese për të rinjtë dhe komunitetin e gjerë të qytetit, të kalojnë kohë cilësore gjatë verës.
Kjo ide erdhi nga modelet e suksesshme të klubeve verore vitin e kaluar, si dhe duke përfituar nga përmirësimet e bëra në mjedisin e jashtëm të shkollës. Stafi i shkollës u angazhua vullnetarisht për të lehtësuar një sërë aktivitetesh, duke ndërthurur argëtimin me përmbajtjen edukative dhe ofruar një përvojë kuptimplotë për të rinjtë dhe fëmijët e komunitetit përreth.
Çdo ditë në kamp i i dedikohej një teme të veçantë, duke i dhënë mundësi të rinjve të zhvillonin aftësi praktike. Aktivitetet përfshinin biseda motivuese për planifikimin e një të ardhme më të mirë, ushtrime simuluese përmes internetit për menaxhimin e zgjuar të parave, mësime praktike me të vegjlit për të bërë sallata frutash apo zhvilluar lojëra sportive, si pjesë e ushtrimeve për të punuar në ekip, etj.
Suksesi i kampit u bë i mundur edhe falë mbështetjes nga partnerë të ndryshëm të komunitetit. Bashkia Prrenjas siguroi bujarisht materiale thelbësore për aktivitetet e kampit, ndërsa një biznes vendas kontribuoi duke ofruar pajisje arsimore dhe akses në ambientet e tij për kurse të veçanta me fëmijët. Mbështetja nga Bashkia Prrenjas ishte, gjithashtu, një mundësi për të përfshirë më shumë të rinj dhe fëmijë nga qyteti.
Falë kësaj përpjekjeje bashkëpunuese, kampi veror i të rinjve jo vetëm që mundësoi kohë cilësore dhe aktive për pjesëmarrësit, por gjithashtu forcoi lidhjet e komunitetit dhe nxiti angazhimin e vazhdueshëm të të rinjve në veprimtari jashtëshkollore dhe vullnetare.
