“Shkolla ime” mbështetet në përvojat novatore, modelet dhe aktivitetet e zbatuara nga Instituti për Demokraci dhe Ndërmjetësim në kuadër të qasjes shumaktoriale “Shkolla Qendër Komunitare” (SHQK). Eksperienca shumë vjeçare e ngritur mbi modelin SHQK, integron ndërveprimin aktiv të institucioneve vendore Bashki, Polici e Shtetit, Zyrë Vendore Arsimore të cilat së bashku me të rinjtë, prindërit, komunitetin dhe shoqërinë civile rrisin shanset për një zhvillim të sigurt dhe të qëndrueshëm të të rinjve dhe komuniteteve vendore.

Instituti për Demokraci dhe Ndërmjetësim, prej tetorit 2017, është angazhuar në një proces ndërtues dhe advokues për modelin “Shkolla Qendër Komunitare“ (SHQK), përmes angazhimit të të rinjve në mbi 30 shkolla të mesme në 25 bashki të vendit. IDM ka rritur përpjekjet për të zgjeruar hartën e zbatimit të qasjes SHQK në pothuajse të gjithë vendin, duke nxitur bashkëpunimin horizontal ndërmjet institucioneve vendore për të marrë përgjegjësi të përbashkëta në aktivizëm, dhe fuqizuar të rinjtë e aktorët e tjerë si agjentë të ndryshimit pozitiv në komunitet.

Suksesi i zbatimit të qasjes shumaktoriale "Shkolla Qendër Komunitare" në nivel vendor qëndron tek angazhimi i përbashkët, pro-aktiv dhe i qëndrueshëm, si dhe ndarja e përgjegjësive ndërmjet të gjithë aktorëve të përfshirë në zbatimin e modelit "Shkolla Qendër Komunitare". Mirëpresim çdo komunikim nga shkolla të tjera SHQK, individë dhe institucione vendore, në dobi të përpjekjeve të vazhdueshme për krijimin e komuniteteve të qëndrueshëm kundër ekstremizmit të dhunshëm.