Gjatë muajit maj nxënës nga gjimnazet “Ali Asllani” Kotë, “Oso Kuka” Shkodër, “Arbëria” Bulqizë, “Halit Bërzeshta” Prrenjas, “Arif Halil Sulaj” Mamurras, “Haxhi Qehaj” Rrogozhinë, “Dom Nikollë Kaçorri” Durrës, “Isa Boletini” Vorë, “Sadik Stavileci” Kashar, “Zihni Magani” Peqin, “Ibrahim Rugova” Kamëz, “Shote Galica” Fushë-Krujë, Skënderbeu Krujë, “16 Shtatori” Shijak, gjimnazi Manëz dhe “Tomorr Sinani” Cërrik u trajnuan rreth edukimit mediatik dhe identifikimit të lajmit të rremë në media, nga eksperti i komunikimit, z. Blendi Salaj.
Të rinjtë mësuan më shumë mbi përdorimin e medias, kryesisht asaj sociale, me qëllim eliminimin e lajmeve të rreme dhe rritjen e sigurisë online. Pas përfundimit të trajnimeve vërehet se ka një interes të lartë nga të rinjtë për të mësuar më shumë mbi median. Gjatë takimeve, të rinjtë shfaqën interes dhe u përfshinë në diskutime për të mësuar më shumë, jo vetëm mbi çfarë quajmë media, por edhe mbi rëndësinë e saj në ndërtimin e koncepteve dhe botëkuptimeve.
Gjithashtu, të rinjtë diskutuan mbi rolin e drejtuesve, konfliktet e mundshme të interesit, dhe fenomenin e lajmeve të rreme në mediat vendase dhe të huaja.
Trajnime me tematika të ngjashme nxjerrin në pah nevojën për më shumë edukim mediatik të brezit të ri në Shqipëri.
