Përgjatë muajit qershor 2021, u zhvilluan trajnimet dy-ditore me pjesëmarrjen e 138 mësuesve, prindërve, psikologëve dhe oficerëve të sigurisë në shkollat e mesme “Ibrahim Rugova” Kamëz; “Halit Bërzeshta” Prrenjas; “Haxhi Qehaj” Rrogozhinë; “Ali Asllani” Kotë; “Arbëria” Bulqizë; “Arif Halil Sulaj” Mamurras; dhe “Oso Kuka” Shkodër.
Ky trajnim synoi rritjen e kapaciteteve të pjesëmarrësve në menaxhimin e çështjeve të sjelljes dhe konflikteve. Modulet mbi “drejtësinë restauruese” synojnë të ofrojnë informacionin dhe mjetet përkatëse se si të trajtohen marrëdhëniet konfliktuale në nivele të ndryshme. Në mënyrë të veçantë, stafi i shkollës u trajnua për të lehtësuar diskutimet me nxënësit dhe për t’u përfshirë në biseda restauruese; zhvillimin e kapaciteteve për të bashkëpunuar me të rinjtë, përdorimin e bisedave restauruese për të adresuar konfliktet, sjelljet negative dhe tensionet midis të rinjve.
Praktikat e zbatimit të drejtësisë restauruese në shkolla tregojnë se ky është një instrument i rëndësishëm që ndihmon në ndërtimin e marrëdhënieve të duhura midis palëve të interesuara, ofron mundësi për dialog të drejtë dhe pjesëmarrje të të gjithë aktorëve të përfshirë. Për më tepër, ai adreson problemet, nevojat, përgjegjësitë dhe rrënjët e çdo konflikti ose sjelljeje negative mes të rinjve, brenda mjedisit të shkollës apo në komunitet.
Ky trajnim u zhvillua në kuadër të projektit “Shkolla Qendër Komunitare – Zgjerimi i rrjetit të komuniteteve të qëndrueshme në Shqipëri”. Qëllimi i këtij projekti është të ndihmojë zhvillimin e komuniteteve nëpërmjet aftësimit dhe angazhimit të aktorëve vendorë. Projekti është duke u zbatuar nga Instituti për Demokraci dhe Ndërmjetësim në 16 gjimnaze në zona të ndryshme të Shqipërisë, me mbështetjen e Ambasadës së Shteteve të Bashkuara të Amerikës në Shqipëri.”
