Gjatë muajit Shtator, Instituti për Demokraci dhe Ndërmjetësim (IDM) zhvilloi një sërë takimesh në qytetet ku zbatohet projekti “Shkolla Qendër Komunitare”, me synim krijimin e Grupit Këshillimor për Shkollën Qendër Komunitare.
Pjesë e takimeve të zhvilluara në Kashar, Durrës, Manëz, Shijak, Vorë, Peqin, Krujë dhe Fushë-Krujë ishin përfaqësues nga Bashkia, Komisariati i Policisë, Zyra Vendore Arsimore, komuniteti fetar, komuniteti i Prindërve, të Rinjtë dhe Shkollat.
Qëllimi i Grupit Këshillimor SHQK është të kontribuojë në mbarëvajtjen e aktiviteteve për të rinjtë, përmes shkëmbimit të informacionit në mënyrë të vazhdueshme dhe të mendimeve apo ideve të reja që mund të vijnë nga të gjithë aktorët e përfshirë, bazuar në nevoja konkrete. Një marrëdhënie e shëndetshme midis mësuesve, prindërve, nxënësve, policisë dhe aktorëve të tjerë të komunitetit është e rëndësishme, pasi kjo do të lejojë që të gjithë të punojnë në mënyrë harmonike së bashku, duke ndikuar pozitivisht në zhvillimin e nxënësve.
Çdo anëtar i grupit këshillimor luan një rol domethënës në mbështetjen e sistemit arsimor. Komuniteti në tërësi është përfituesi kryesor i një sistemi të suksesshëm arsimor. Kjo sepse shkollat përgatisin punonjësit, sipërmarrësit dhe drejtuesit e ardhshëm të komunitetit. Një bashkëpunim funksional dhe i vazhdueshëm midis aktorëve të ndryshëm ndërton një komunitet më të fortë duke përgatitur të rinjtë të jenë anëtarë të suksesshëm të komunitetit të tyre.
Të gjithë aktorët e Grupit Këshillimor për Shkollën Qendër Komunitare do të bashkëpunojnë për planifikimin dhe ndërtimin e një komuniteti të qëndrueshëm, ku të rinjtë rrisin aftësitë e tyre, të mësuarit dhe angazhimin në nisma komunitare.
Nga ana tjetër, përmes grupeve këshillimore prindërit mund të adresojnë shqetësimet dhe sugjerimet e tyre në një mjedis bashkëpunues. Për më tepër, prindërit mund të ndihmojnë në monitorimin dhe vlerësimin e zbatimit të kurrikulës, veçanërisht duke u bërë pjesë aktive në organizimin e aktiviteteve sociale dhe kulturore.
Përmes ngritjes dhe aktivizimit të Grupeve Këshillimore, Instituti për Demokraci dhe Ndërmjetësim synon forcimin e marrëdhënieve multi-aktoriale në komunitet, ku bashkëpunimi midis palëve të ndryshme do të krijojë mundësi të reja për adresimin e nevojave të të rinjve dhe të komunitetit dhe zgjidhjen e tyre.
Këto takime zhvillohen në kuadër të projektit “Ndërtimi i një komuniteti të qëndrueshëm nëpërmjet modelit “Shkolla Qendër Komunitare” zbatuar nga Instituti për Demokraci dhe Ndërmjetësim (IDM) dhe mbështetur nga Ambasada e Shteteve të Bashkuara të Amerikës.
#SHQK #PerKomunitetin