246 pjesëmarrës nga gjimnazet, bashkitë, drejtoritë vendore të policisë, zyrat vendore arsimore, të rinj dhe organizata rinore u mblodhën së bashku në Konferencën Kombëtare të organizuar nga IDM Albania “Shkolla Qendër Komunitare” – Modeli shumaktorial për komunitete të qëndrueshme në Shqipëri.
Përvojat e shkollave për zgjerimin e modelit SHQK; Fuqizimi i të rinjve dhe rritja e aktivizmit rinor; dhe Qëndrueshmëria e modelit SHQK për të trajtuar kërcënimet e reja të ekstremizmit të dhunshëm në komunitet ishin në qendër të fjalimeve të mbajtuara nga të gjithë aktorët e përfshirë tashmë prej 7 vitesh në zbatimin e modelit shumaktorial SHQK në Shqipëri.
Eventit iu bashkuan E Ngarkuara me Punë në Ambasadën e SHBA, znj. Nancy VanHorn; Ministrja e Arsimit dhe Sportit, znj. Ogerta Manstirliu; Ministri i Brendshëm, z. Ervin Hoxha; dhe Koordinatori Kombëtar për Parandalimin dhe Kundërshtimin e Ekstremizmit të Dhunshëm, znj. Lejdi Dervishi; për të promovuar sw bashku bashkëpunimin dhe angazhimin qytetar për një shoqëri të sigurt dhe të qëndrueshme.
Prej tetorit 2017, me mbështetjen e Ambasadës së Shteteve të Bashkuara të Amerikës, IDM është angazhuar në një proces ndërtues dhe advokues për modelin “Shkolla Qendër Komunitare“ (SHQK). Ky model synon rritjen e qëndresës komunitare ndaj ekstremizmit të dhunshëm – natyra në zhvillim e të cilit vazhdon të krijojë sfida, përmes angazhimit të të rinjve në mbi 30 shkolla të mesme nga 25 bashki të vendit.
Përvoja e konsoliduar ndër vite ka forcuar konceptin tonë për ta sendërtuar këtë nisëm si një qasje shumaktoriale kombëtare, ku krahas aktorëve të shkollës- nxënësve, mësuesve dhe prindërve, gjithnjë e më tepër ka marrë rol partneriteti me njësitë e qeverisjes vendore, strukturat e Policisë së Shtetit, dhe shoqërinë civile. Përpjekja është drejtuar në nxitjen e bashkëpunimit horizontal ndërmjet institucioneve vendore duke marrë përgjegjësi të përbashkëta në aktivizëm, si dhe duke fuqizuar të rinjtë dhe aktorët e tjerë si agjentë të ndryshimit pozitiv në komunitet.
