Në 15 Janar 2021, u zhvillua takimi i gjashtë i bordit drejtues të projektit “Fuqizimi i komuniteteve lokale në parandalimin e çdo forme të ekstremizmit të dhunshëm përmes modelit Shkolla Qendër Komunitare në bashkinë Kamëz” me pjesëmarrjen e Kryetarit të Bashkisë së Kamzës, mësuesve, nxënësve dhe prindërve.
Gjatë takimit u theksua rëndësia e zbatimit të një qasje shumëaktoriale për të rinjtë dhe komunitetin lokal të Kamzës në adresimin e problematikave të ndryshme.
Të rinjtë u shprehen të gatshëm për tu angazhuar në iniciativa të ndryshme, të cilat mund të vijnë nga shkolla, bashkia, por edhe nga projekte të tjera të zbatuara në Kamez që kanë për qëllim fuqizimin e të rinjve.
Pjesë e veçantë e këtij takimi ishte kontributi i të rinjve në prezantimin e prioriteteve për bashkinë Kamez. Të rinjtë kishin ndarë tematikat e prioriteteve të tyre në dy klube, përkatësisht, klubi i demokracisë i cili synon rritjen e kompetencave qytetare për demokraci dhe klubi i vajzave dhe grave i cili synon fuqizimin e vajzave dhe grave në Kamëz.
Disa nga prioritetet kryesore të prezantuara nga klubi i demokracisë synonin të mbështesnin edukimin për të drejtat e njeriut, akses në të drejtat sociale për të rinjtë dhe aktivitete për përfaqësimin e të rinjve në nivel lokal.
Ndërsa nxënësit në klubin e vajzave dhe grave theksuan rëndësinë e fuqizimit të organizatave të drejtuara nga vajzat dhe gratë që synojnë të rrisin ndërgjegjësimin për dhunën në familje dhe atë me bazë gjinore. Për më tepër të rinjtë theksuan domosdoshmërinë e mundësive për mentorim dhe për krijimin e rrjeteve për të fuqizuar iniciativat e ndërmarra nga vajzat dhe gratë.
