Në kuadër të Ditës Ndërkombëtare të Librit, në dt 23 prill, në ambientin e shkollës sonë u organizuan një sërë aktivitesh, në të cilin morën pjesë nxënës e mësues.
Për shkak të situatës së pandemisë, një pjesë e mirë e veprimtarisë u zhvillua në mjediset fizike të klasave, me mësuesit e lëndëve të gjuhës shqipe dhe të letërsisë. U zhvillua konkursi për esenë më të mirë mes klasave të dhjeta me temë : “Shokë të mirë, libra të mirë, dhe një ndërgjegjie të pastër: kjo është jeta ideale” – Mark Twain
Në disa prej klasave, drejtoresha e shkollës u bëri thirrje nxënësve që të përdorin më pak teknologjinë dhe të lexojnë më shumë, sepse teknologjia po e zbeh mësimin dhe nuk mund të zëvendësojë librin fizik.
Më pas, senatorët e qeverisë së nxënësve mblodhën disa libra që u dhuruan nga nxënës të shkollës sonë, të cilët iu përgjigjën nismës “Dhuro një libër për bibliotekën e shkollës”, për të bërë të mundur pasurimin e fondit modest të librave në shkollën tonë. Në bashkëpunim me mësues, ata shpërndanë disa fletëpalosje për rëndësinë e librit dhe të lexuarit.
Aktiviteti vijoi me një grup nxënësish që lexuan dhe recituan fragmente nga letërsia botërore dhe ajo shqiptare në oborrin e shkollës. Thënie dhe citime nga autorë të ndryshëm pasuruan ditën e sotme duke theksuar edhe një herë mesazhin se leximi ndikon në krijimin e personalitetit dhe nxit të menduarit kritik.
Pra, le të mos e humbasin kontaktin dhe lidhjen me librin, duke e parë atë si një dritare e cila do të na krijojë një vizion dhe të ardhme të re.