Në Bulqizën e minatorëve rreth 40 vite më parë, në 1980 u hap gjimnazi i përgjithshëm që do të mblidhte të rinjtë e "Grykës së Madhe", me qëllimin madhor të shpërndante dijen dhe të edukonte brezat. Por kjo godinë ka shërbyer edhe më përpara këtij viti si nje hallkë e rëndësishme për profesionizimin e të rinjve në degën e minierës dhe më pas të agronomisë. Me hapjen e dyerve si gjimnaz i përgjithshëm në vitin shkollor 1980-1981, u ndërtua një staf pedagogjik i shkëlqyer, i cili do t’u plotësonte të rinjve nevojën për dije. Edhe pse u krijua një gjimnaz i përgjithshëm, shkolla profesionale vazhdoi punën e saj në të njëjtën godinë deri në vitin 1989.

Dija po transmetohej në mënyrën më të mirë të mundshme dhe të rinjtë nga qyteti e fshatrat për rreth po shtoheshin çdo vit e më shumë. Kushtet në të cilat mësimi zhvillohej ishin nga më të mirat e kohës. Si një tempull i ri i arsimit, shkolla i dha frymëmarrje dhe gjalleri rinisë së qytetit. Gjimnazi nuk ndaloi në asnjë moment çuarjen përpara të synimit të tij, arsimimin. Në vitin 2018 këtij gjimnazi ju vendos emri "Arbëria".

Gjimnazi "Arbëria" është një institucion me traditë ku rritja e cilësisë së shërbimit, dhe në veçanti përsosja e nivelit të mësimdhënies dhe kërkimit shkencor arrihet nëpërmjet komunikimeve të vazhdueshme dhe të frytshme me nxënësit dhe prindërit. Stafi pedagogjik në misionin e tij të rëndësishëm ka treguar vlera dhe profesionalizëm.

Dija, etika dhe profesionalizmi janë parakusht në arritjen e sukseseve të këtij gjimnazi.